Министерот за здравство, Арбен Таравари, најави дека наскоро ќе се сретне со премиерот Христијан Мицкоски за да му ја презентира, како што рече, реалната слика за последните случувања во Владата и одлуката на неговото крило на партијата.
– Премиерот Мицкоски изминатиот период беше под сериозен притисок поради различни причини. Жал ми е што гледам дека и тој станува жртва на разни уверувања. Единствената вистина е дека нашата партија одлучи да настапи со посебни листи за советници на локалните избори – изјави Таравари за ТВ 21.
Според него, токму оваа одлука предизвикала незадоволство кај дел од албанските структури во Владата, кои, како што вели, започнале да шират шпекулации и алиби.
– Не сакаме повеќе да бидеме дел од таа клима на сомнежи, манипулации и заговори. За жал, дел од политичарите Албанци во Владата се уште функционираат со стар политички менталитет – додаде Таравари.
Тој најави дека ќе го информира премиерот за конечната одлука на неговото крило на Алијанса за Албанците, со цел да расчистат сите недоразбирања и шпекулации.
