Рано утрово, Штип беше потресен од трагичен семеен настан – 54-годишниот С.З., поранешен познат угостител, ја усмрти својата 84-годишна мајка во семејниот дом. Според информациите од Министерството за внатрешни работи, убиството се случило на 8 август 2025 година, околу 02:00 часот.
Осомничениот, за кого блиски извори велат дека со години се борел со алкохолна зависност и коцкарски проблеми, со остар предмет ѝ нанел убодна рана на мајка си, од која таа починала на лице место. Смртта ја констатирал лекар од Итната медицинска помош.
„Во 04:15 часот, полициските службеници од СВР Штип го лишиле од слобода осомничениот. На лице место бил извршен увид под раководство на Јавното обвинителство, а телото на починатата е предадено на обдукција“, информираат од МВР.
Оружјето со кое било извршено убиството е пронајдено и одземено за понатамошна постапка. По целосно расчистување на случајот, против С.З. ќе биде поднесена кривична пријава по итна постапка за убиство на близок роднина, согласно член 123 став 2 точка 2 од Кривичниот законик.
Соседите и познаниците во Штип се во шок. С.З. важел за успешен угостител, но последните години неговиот живот тргнал во надолна линија поради зависностите, кои, според сведоци, го оддалечиле од бизнисот и од семејството.
Истражните органи продолжуваат со прибирање на докази, додека јавноста очекува одговори за трагедијата што ја потресе штипската заедница.
