Македонската амбасада во Љубљана добила известување дека во текот на ноќта на 2 октомври животот го загубил македонски државјанин, роден 1986 година во Кочани, соопшти Министерството за надворешни работи (МНР).
МНР информира дека, според информациите од словенечката полиција, блиските на починатиот се веќе известени, а случајот го разгледува Секторот за криминалистичка полиција.
„Амбасадата на Република Северна Македонија во Љубљана е во контакт со семејството на починатиот и со надлежните словенечки институции, со цел обезбедување на потребната конзуларна поддршка и следење на понатамошниот тек на постапката“, велат од МНР.
Словенечките медиуми објавија дека 38-годишниот маж од Северна Македонија починал во центарот на Љубљана. Порталот 24.ur.com објави дека неговото тело е пронајдено во четвртокот во раните утрински часови.
Иако според неофицијални информации тој бил претепан до смрт, словенечката полиција тоа не го потврдила.
„Полициските службеници извршија увид на местото на настанот, наредена е обдукција, а причината за смртта сè уште не е утврдена. Во тек е интензивна кривична истрага. Надлежното државно обвинителство ќе биде информирано за сите наоди“, изјави портпаролката на полицијата.
Полицијата, исто така, не ги потврди ниту наводите дека починатиот маж е пронајден на локацијата Метелкова.
