Американскиот претседател Доналд Трамп изјави дека ќе поднесе тужба од 15 милијарди долари за клевета и навреда против весникот „Њујорк тајмс“. Оваа вест тој ја објави на својата социјална платформа „Truth Social“.
Трамп го обвини весникот за „децениски лаги“ против него, неговото семејство, бизнисот, движењето „Америка на прво место“ и американската нација. Во објавата, тој исто така го критикуваше „Њујорк тајмс“ за поддршката на неговата противкандидатка Камала Харис на претседателските избори во 2024 година, наведувајќи дека весникот станал „виртуелен гласноговорник на радикалната левичарска демократска партија“.
Тужбата ќе биде поднесена во Флорида, но не беа дадени дополнителни детали.
Ројтерс потврди дека судскиот поднесок, во кој имал увид, покажува дека Трамп го тужи весникот. Американскиот претседател претходно поднесе тужби против „ABC News“ и „Парамаунт“, кои биле решени за 15 и 16 милиони долари, соодветно.
„‘Њујорк тајмс’ имаше право да лаже, клевети и дискредитира предолго, но тоа завршува сега“, напиша Трамп.
Весникот „Њујорк тајмс“ сè уште нема одговор на барањето за коментар.
