На денешното рочиште за судењето за трговија со дрога, вештак на Обвинителството сведочеше дека обвинетиот Раде Трајковски-Штекли е способен да го следи судскиот процес. Според вештакот, Трајковски не е психотичен, иако имал „паранормални искуства“.
Ова се дозна откако Трајковски му кажал на вештакот дека во минатиот живот бил желка, дека сега е реинкарниран во човек и затоа не јаде месо.
Наодите на вештакот се спротивни на оние на психијатарот од одбраната, кој го оцени Трајковски како психотичен со шизофрени карактеристики, што го прави неспособен да ја следи судската постапка.
Судијата Илија Трпков најави дека ќе ги соочи двајцата вештаци пред да донесе одлука. Во меѓувреме, четворица обвинети од групата на Трајковски признаа вина, а седуммина се спогодија со Обвинителството и добија затворски казни. Трајковски е во притвор од јануари, кога беше уапсен при обид за бегство.
