Ракометарите на Алкалоид и ГРК Охрид одиграа одлично дерби на стартот на новата сезона во Суперлигата, а натпреварот заврши без победник со резултат 24:24. Драмата достигна кулминација во последните секунди, кога Карасманакис го постигна израмнувачкиот гол.
Охрид го заврши првото полувреме со предност од два гола (11:13), но Алкалоид влезе посилно во второто. Со цврста одбрана и неколку клучни одбрани на голманот Кизиќ, домаќините направија серија од 6:0 и поведоа со 19:15.
Сепак, искусниот тим на ГРК Охрид не се предаде. По 10-минутна криза во нападот, гостите успеаја да се вратат во игра. Благодарение на головите на Џукиќ, тие се доближија на само еден гол негатива (19:18).
Во последните минути, Алкалоид влезе во серија на грешки, а ГРК Охрид го искористи тоа, па со головите на Џукиќ, Вејн и Јотиќ успеаја да поведат со 22:23.
На крајот, нервите беа клучни. Иако Иванковиќ го донесе Охрид во водство од 24:23, Карасманакис во последниот напад успеа да израмни и да постави конечен резултат, со што двата тима ги поделија бодовите.
Најефикасен кај Алкалоид беше Борзаш со шест гола, додека кај Охрид, Џукиќ постигна пет.
