Министерот за земјоделство, шумарство и водостопанство, Цветан Трипуновски (ВМРО-ДПМНЕ), без да даде детали за аферата со злоупотреба на ИПАРД фондовите, директно го нападна неговиот претходник Љупчо Николовски (СДСМ), тврдејќи дека тој го користел умот „исклучиво за криминал и ширење страв и паника кај земјоделците“.
Во соопштението испратено од ВМРО-ДПМНЕ, Трипуновски го обвини Николовски за манипулации и обид за вештачко одржување во јавноста, тврдејќи дека неговата политичка кариера е завршена.
„Наместо да глуми загрижен, добро би било да повика ОЈО да започне да го истражува неговото незаконско работење како поранешен министер“, порача Трипуновски.
Во однос на аферата со злоупотреба на европските фондови, Трипуновски не даде детали, но потенцираше дека „нема простор за загриженост“.
„Брисел ја поздрави брзата реакција на Владата за истражување на случувањата во Агенцијата. Претходно СДС во опозиција кодошеа и ја кочеа Македонија надвор, но тоа сега не им успева“, се вели во соопштението.
Трипуновски порача дека Владата останува посветена на транспарентно и отчетно работење и бескомпромисна борба против криминалот.
Министерот го потсети Николовски на периодот кога бил антикорупционер и „врвно достигнување“ му било броењето на испиени чаши со вода на министрите.
„Епа сега за разлика од претходно, се апси, нема повеќе наш и ваш. Принципот по кој владееше ти и владата на СДС, како до сега ЗАВРШИ. Навикни се, сега има закон, правила и прописи кои мора да се почитуваат. Секој што се огрешил пред законот и направил злоупотреба на службената позиција мора и ќе одговара“, заклучува ВМРО-ДПМНЕ.
