Турскиот претседател Реџеп Таип Ердоган денеска во телефонски разговор со американскиот претседател Доналд Трамп изјави дека Турција ги поздравува напорите на Соединетите Американски Држави за постигнување мир во регионот, но нагласи дека Израел мора да ги запре нападите за да може овие напори да бидат успешни.
Разговорот бил побаран од американската страна, а кабинетот на Ердоган соопшти дека Турција, која претходно ги нарече израелските напади во Газа геноцид и ги суспендираше сите трговски односи со Израел, ја поддржува најновата иницијатива на Трамп за ставање крај на војната.
Во однос на ситуацијата во Газа, Ердоган го информирал Трамп дека Турција работи напорно за постигнување регионален мир и дека ги зголемила своите дипломатски контакти за таа цел.
„Ердоган нагласи дека Турција… ќе продолжи да ја поддржува визијата за глобален мир и дека запирањето на нападите од страна на Израел е важно за успехот на иницијативите насочени кон постигнување мир во регионот“, се вели во соопштението.
За време на разговорот, двајцата лидери разговарале и за билатералните односи. Турскиот претседател ја нагласил важноста од преземање чекори за зајакнување на соработката меѓу двете земји, особено во одбранбената индустрија. Ердоган истакна дека нивната средба во Белата куќа минатиот месец дополнително ги зацврстила врските меѓу двете земји.
