Кошаркарската репрезентација на Турција се пласираше во полуфиналето на Европското првенство, откако во првиот четвртфинален натпревар ја победи Полска со резултат 91:77.
Клучната предност, Турција ја стекна во втората четвртина, која ја доби со 27:13, по изедначениот резултат од 19:19 по првиот период. Иако Турција имаше предност од 21 поен, Полска успеа да ја намали разликата на само осум, но Турција го одби нивниот налет со две последователни тројки.
Алперен Шенгун со историски трипл-дабл
Најзаслужен за победата на Турција беше Алперен Шенгун, кој постигна историски успех. Центарот на Хјустон Рокетс го забележа шестиот трипл-дабл во историјата на Евробаскетот, завршувајќи го натпреварот со 15 поени, 11 скока и 10 асистенции.
Други играчи со двоцифрен ефект за Турција беа Шејн Ларкин (13 поени, 5 скока), Шехмуз Хазер (13 поени) и Ерџан Османи и Џеди Осман со по 10 поени.
Најдобри кај Полска беа Матеуш Понитка (19 поени, 5 скока, 6 асистенции) и Џордан Лојд (19 поени, 3 скока).
Во полуфиналето, Турција ќе се соочи со победникот од натпреварот помеѓу Литванија и Грција.
