Селекторот на англиската фудбалска репрезентација, Томас Тухел, ја шокираше јавноста со остра критика кон англиските навивачи веднаш по убедливата победа од 3:0 над Велс на вчерашниот контролен натпревар, обвинувајќи ги за недоволна поддршка и „гробова тишина“ на „Вембли“.
Тухел истакна дека неговиот тим одиграл фантастично прво полувреме и постигнал три брзи гола, но дека изостанала енергијата од трибините.
„Имавме ден и половина да се подготвиме за натпреварот против добро организиран тим и се покажавме многу добро. Можевме да водиме со 5:0 на полувреме. Но, ги промашивме четвртиот и петтиот гол“, изјави Тухел за перформансот на тимот.
Сепак, германскиот стручњак не го криеше разочарувањето од атмосферата на стадионот:
„На стадионот владееше тишина. Не добивме никаква енергија од трибините. Направивме сѐ што можевме за да победиме, а не добивме ништо за возврат. Ако сè што можете да чуете половина час се навивачите на Велс, тоа е тажно бидејќи тимот денес заслужуваше повеќе од тие кои беа на трибините на ‘Вембли’“, заклучи селекторот на Англија во интервју по мечот.
