Украинскиот претседател Володимир Зеленски соопшти дека е уапсен осомничен за убиството на поранешниот претседател на Парламентот, Андриј Парубиј. Убиството се случи во саботата во градот Лвов.
Зеленски преку социјалните мрежи им се заблагодари на истражните органи за „брзата и координирана работа“, додавајќи дека истрагата е во тек.
Андриј Парубиј (54) беше истакнат лидер на проевропските движења во Украина. Тој одигра клучна улога во „Портокаловата револуција“ во 2004 година, а подоцна беше „командир“ на групите за самоодбрана за време на протестите на Мајдан во 2014 година, кои доведоа до заминување на тогашниот проруски претседател Виктор Јанукович.
Шефот на украинската воена разузнавачка служба, Кирил Буданов, претходно ја обвини Русија за убиството, поврзувајќи го чинот со војната која трае од февруари 2022 година.
