Фондот за здравствено осигурување (ФЗО) соопшти дека, според нивната електронска евиденција, разрешениот директор на Клиниката за неврологија, д-р Игор Кузмановски, е евидентиран како активен специјалист по неврологија со факсимил број 712680, во рамки на договорот со Клиниката.
ФЗО истакнува дека факсимилот на Кузмановски е активен од 1 април 2010 година, со еден прекин во 2018 година поради неплатено отсуство.
Фондот посочува дека одобрението за издавање на факсимилот е дадено врз основа на официјално доставен список на лекари вработени во Клиниката за неврологија, кој бил потврден и заверен од самата здравствена установа.
Во соопштението се нагласува:
Согласно членот 3 од договорот меѓу ФЗО и Клиниката, „обврска на здравствената установа е да обезбеди стручен кадар кој ги исполнува условите… меѓу кои и условот лекарите да поседуваат важечка лиценца за работа“.
Според актуелната процедура, при склучување договори, здравствената установа треба да достави барање придружено со важечка лиценца за работа издадена од соодветната комора и заверена на нотар.
ФЗО додаде дека во обид да спречи незаконско работење и фалсификување на лиценци, на 15.11.2024 година се обратил до Лекарската комора за електронско поврзување и преземање на сите активни лиценци, но Комората до денешен ден не одговорила на барањето.
ФЗО најави дека останува доследен во примената на законските прописи и подготвен за транспарентна комуникација.
