Претседателот на Социјалдемократскиот сојуз на Македонија (СДСМ), д-р Венко Филипче, во своето обраќање на граѓанската трибина „Се бориме за нашиот дом“ во Охрид, истакна дека за само година и пол владеење, ВМРО-ДПМНЕ не донесе ништо друго освен ароганција, поделби и изневерени очекувања.
Филипче го критикуваше владеењето на ВМРО-ДПМНЕ, велејќи дека власта нема капацитет да изгради правна држава, туку нуди само празни изјави.
„Што да се каже за правда и правна држава кога ВМРО-ДПМНЕ е на власт? За нив тоа е непозната именка, апстрактна уметност – зборуваат за неа, ама никој не ја гледа. Театрални изјави, без ниту еден донесен закон од реформската агенда за вистинско реформирање на правосудниот систем“, нагласи Филипче.
Лидерот на СДСМ го критикуваше и премиерот Мицкоски за евроинтеграцискиот процес, посочувајќи дека иако Мицкоски секојдневно дава изјави дека нешто се поместува, државата всушност е сѐ подалеку од ЕУ.
„Сам се пофали премиерот дека реформската агенда е „најдобриот документ што го подготвила оваа Влада“, понатаму дека е „инструмент за демократизација на општеството“, понатаму „патоказ за да ја донесе Европа дома“, но со секој изминат ден државата ни е сѐ подалеку од Европа и од демократија со Мицкоски. Секоја негова изјава е едноставно нова лага“, рече Филипче.
Филипче заклучи дека поради ваквата состојба, повеќе од кога било е потребна мобилизација и единство. Тој оцени дека само со јасна и силна опозиција може да се спречи понатамошната деградација на државата.
„Наша обврска е да ги спречиме, СДСМ е партијата која може да го направи тоа и јас верувам дека секој еден од вас тоа го знае… Наша задача да им ја вратиме вербата дека сме тука за нив“, порача претседателот на СДСМ.
