Управата за финансиска полиција поднесе кривична пријава до Основното јавно обвинителство – Скопје против осум лица, поранешни функционери и службеници во Општина Сарај и Град Скопје, како и против еден надзорен инженер. Тие се сомничат за злоупотреба на службената положба и овластување, несовесно работење и фалсификување на деловни книги, со што на еден правен субјект му овозможиле противправна имотна корист од 108.638.840 денари (околу 1,7 милиони евра).
Пријавените се поранешниот градоначалник Б.Б., поранешните секретари на Општина Сарај С.Ш. и Ќ.К., раководителите на сектор за урбанизам А.С. и Ќ.А., помладиот соработник А.Ш., раководителот на сектор за планирање и уредување на просторот во Град Скопје И.Б.Ш., како и надзорниот инженер Љ.Т.
Според Финансиската полиција, пријавените изготвиле и одобриле извод од план и одобрение за градба со невистинита содржина, иако биле свесни дека за конкретната катастарска парцела (КП 10405/6 КО Сарај) не постои донесен детален урбанистички план (ДУП).
Дополнително, надзорниот инженер Љ.Т. извршил технички преглед и изготвил завршен извештај со невистинита содржина.
„На овој начин, пријавените лица, злоупотребувајќи ја својата службена положба и овластувања, како и несовесно вршејќи ги своите должности, му овозможиле на правниот субјект ‘Азра Идриз’ ДООЕЛ од с. Глумово, Скопје – Сарај, да се стекне со противправна имотна корист во износ од 108.638.840 денари“, се наведува во соопштението.
Лицата се товарат за кривични дела „Злоупотреба на службена положба и овластување“, „Несовесно работење во службата“ и „Фалсификување или уништување на деловни книги“.
