Претседателката на Европската Унија, Урсула фон дер Лајен, денес во Белград изјави дека очекува Србија да се движи двојно побрзо на патот кон Европската Унија. Таа нагласи дека изборот на Србија за ЕУ пред две децении е „желба на народот на Србија од срце“, а не само стратешки избор.
На заедничката прес-конференција со српскиот претседател, Фон дер Лајен истакна дека членството нуди мир, просперитет и солидарност. Како пример, го наведе справувањето со енергетската криза од 2022 година, каде ЕУ обезбедила исти мерки на солидарност и за Западен Балкан. Таа ја пофали соработката за енергетските проекти како Трансбалканскиот енергетски коридор и гасниот интерконектор Бугарија-Србија, и ја покани Србија да се приклучи на заедничкиот механизам на ЕУ за набавка на гас.
Сепак, претседателката нагласи дека сега е вистинскиот момент Србија да преземе конкретни чекори кон приклучување. Потребен е напредок во областа на владеењето на правото, електронските медиуми и изборните закони.
Фон дер Лајен побара и поголем степен на хармонизација во надворешната политика, вклучително и воведување санкции против Русија.
„Морам да ве пофалам затоа што ја хармонизиравте вашата надворешна политика со нашата за 61 процент, но потребно е повеќе. Мора да сметаме на Србија како на сигурен партнер“, рече таа.
Таа додаде дека ЕУ сака уште сега да овозможи некои од придобивките од идното пристапување, како пристап до заедничкиот пазар и поголем степен на инвестиции, што е суштината на Планот за Западен Балкан. Фон дер Лајен го покани српскиот претседател да го посети Брисел за еден месец за заеднички да ја проценат ситуацијата.
