Шпанската Национална комисија за пазари и конкуренција (CNMC) отвори официјална истрага против Европската фудбалска федерација (УЕФА) под сомневање за ограничување на конкуренцијата во европските клупски натпреварувања. Централната точка на истрагата е начинот на кој УЕФА се спротивставила на проектот Европска Суперлига.
Според соопштението на CNMC, постојат индиции дека УЕФА презела мерки за да ги спречи клубовите да организираат или да учествуваат во алтернативни натпреварувања. Истрагата е покрената по жалба на „A22 Sports Management“, компанијата што стои зад проектот Суперлига.
„Постои сомневање дека УЕФА склучила договори со девет клубови за да го оневозможи формирањето на други фудбалски лиги, како и дека вршела притисок преку закани за исклучување од нејзините официјални натпреварувања“, стои во извештајот на CNMC.
Иако истрагата е сè уште во рана фаза, CNMC нагласува дека има елементи кои укажуваат на можна злоупотреба на доминантна позиција на пазарот, но додава дека отворањето на постапката не претпоставува вина.
Проектот Европска Суперлига беше објавен во 2021 година со поддршка од 12 елитни клуба, меѓу кои Реал Мадрид и Барселона. Тој беше замислен како конкурент на Лигата на шампионите, но брзо се соочи со остри реакции од јавноста и навивачите. Шесте англиски клубови, под притисок, се повлекоа, а по нив и останатите поддржувачи.
Во мај 2024 година, шпанскиот суд оцени дека и ФИФА и УЕФА ја злоупотребиле својата доминантна позиција, повикувајќи се на пресуда на Судот на правдата на Европската Унија, кој утврди дека забраната за Суперлига е спротивна на европското право.
Идејата за алтернативно натпреварување беше реанимирана кон крајот на 2023 година, кога „A22 Sports Management“ го претстави новиот проект „Unify League“ – структура со 64 клуба поделени во три нивоа.
Оваа истрага може да има далекусежни последици врз иднината на европскиот фудбал и на монополската позиција на УЕФА како единствен организатор на елитни натпреварувања.
