Кандидатката за градоначалник на Скопје од СДСМ, Каја Шукова, изјави дека дождот не е доволен за да се изгаси пожарот на депонијата Дрисла и дека има конкретно решение за проблемот. Таа ја обвини актуелната власт на ВМРО-ДПМНЕ за несоодветен третман на отпадот, што е причина за честите пожари.
Според Шукова, основниот проблем лежи во тоа што отпадот на депонијата не се третира правилно. Таа објасни дека соодветниот третман подразбира компактирање и покривање на отпадот со земја или глина, со што се истиснува кислородот и се спречува самозапалување. Таа нагласи дека во близина на Дрисла има глина која не се користи за оваа цел.
Шукова додаде дека не се контролираат ниту гасовите кои можат да предизвикаат експлозии, а гасењето на пожарот со вода создава нов проблем – загадување на Маркова Река.
„Наместо заштита на граѓаните и соодветни решенија, најлесно е да се обвини СДСМ. Еднаш видовме неуспешна концесија за Дрисла, сега нудат јавно приватно партнерство, од тоа само ВМРО-ДПМНЕ ќе има бизнис и личен профит, а жителите на Скопје и понатаму ќе се трујат“, рече Шукова.
Кандидатката најави дека нејзиниот план вклучува воспоставување систем за отпад, кој предвидува намалување на количините преку селектирање и реупотреба, покрај соодветниот третман на депонијата.
