Кандидатката за градоначалничка на Град Скопје од СДСМ, Каја Шукова, ја обвини власта на ВМРО-ДПМНЕ дека свесно го загрозила здравјето на граѓаните по пожарот во Трубарево, криејќи ги резултатите од мерењата на загаденоста на воздухот.
Според неа, власта ги оставила граѓаните да се трујат, убедувајќи ги дека опасност нема.
Шукова истакна дека дури по шест дена биле објавени резултати кои покажуваат дека концентрацијата на кадмиум била речиси 12 пати над дозволената граница, а над максимално дозволените вредности биле и арсенот и оловото.
Според Шукова, оваа ситуација е доказ за неспособноста на власта, која не знае за превенција и заштита и се крие зад лаги. Таа нагласи дека мора да има одговорност и дека животот на граѓаните не смее да зависи од „лагите и калкулациите на ВМРО-ДПМНЕ“.
