Кандидатката за градоначалничка на Град Скопје од СДСМ, Каја Шукова, изјави дека пожарите на „Вардариште“ и депонијата „Дрисла“ се доказ за, како што рече, „неодговорното и неспособно управување на ВМРО-ДПМНЕ со градот“. Таа ги обвини актуелните градски власти дека четири години немаат системско решение за управување со отпадот, додека здравјето на скопјани е секојдневно загрозено.
„Додека градот се гуши во ѓубре и чад, тие одржуваат прес-конференции за нереални фестивали, паркови на контаминирано земјиште за евтини партиски поени“, рече Шукова.
Шукова го критикуваше противкандидатот Орце Ѓорѓиевски дека се крие и избегнува соочување со граѓаните. Таа го нарече неговиот проект „парк на Вардариште“ пример за „краткорочен популизам“, кој не го решава суштинскиот проблем.
„Вардариште и Дрисла станаа симболи на хаосот во управувањето со отпад – хаос што ВМРО-ДПМНЕ не знае, не може и не сака да го реши“, изјави таа.
Шукова го претстави планот на СДСМ за решавање на проблемот со отпадот во Скопје:
- Краткорочно: Итно оградување и заштита на просторот на „Вардариште“ и воспоставување 24-часовно физичко обезбедување за спречување пожари.
- Долгорочно: Изградба на нова претоварна станица според европски стандарди, како дел од целосен систем за управување со отпад.
На крајот, Шукова го повика Ѓорѓиевски на јавно соочување за да покажат кој има реална визија и план за решавање на овој проблем, нагласувајќи дека здравјето на граѓаните мора да биде приоритет.
