Кандидатката за градоначалничка на Град Скопје од СДСМ, Каја Шукова, денеска ја претстави својата визија за Старата скопска чаршија, која, како што рече, е задушена од нечистотија, административен хаос и институционална негрижа. Шукова вети дека има јасен план за да им ја врати Чаршијата на скопјани како живо срце на градот.
„Чаршијата е душата на Скопје, но е задушена од нечистотија, административен хаос и институционална негрижа. Нашиот план е јасен, визијата е да им ја вратиме Чаршијата на скопјани. Имам решение: секојдневно чистење, нова урбана опрема, јавно осветлување и ви-фи зони, со почит кон автентичниот изглед,“ изјави Шукова од пред споменикот на Скендербег.
Шукова најави дека нејзиниот главен приоритет ќе биде крај на лавиринтите меѓу институциите.
„Нашата цел е Чаршијата конечно да добие Центар за управување под целосна надлежност на Град Скопје. Без лавиринти меѓу институции, туку ефикасна, брза и транспарентна администрација за сите што живеат и работат таму,“ истакна таа.
Доколку ја добие довербата, Шукова вети и директна поддршка за дуќанџиите и занаетчиите:
Буџетски средства за реконструкција на дуќани.
Правна и финансиска помош.
Отворање школи на занаетчии и мајсторски работилници.
Култура, туризам и европски рути
Кандидатката на СДСМ најави и поддршка за културата и туризмот, што ќе ја заживеат Чаршијата:
Реновирање на Сули ан.
Поддршка за студентите по ликовна уметност, отворање арт атељеа и културни програми.
Развивање дигитална платформа за туристи, јазични обележја и подобрена пешачка инфраструктура.
Вклучување на Чаршијата во европски културни рути.
„Ова не е уште едно ветување. Ова е визија што ја враќа Чаршијата како живо срце на Град Скопје, бидејќи ние се бориме за нашиот дом,“ заклучи Шукова.
