Адвокатката Сузана Јошевска Анастасовска, гостувајќи на телевизијата „24“, изрази загриженост за изборот на судии чии имиња се поврзуваат со одредени влијателни личности. Таа порача дека, иако не се противи на унапредување на судии кои имаат блиски односи со функционери, сепак јавноста има причина за скепса кога таквите избори не изгледаат базирани на заслуги.
„Да се биде судија значи и да се носи одговорност. Не сум поборник на ставот дека секој со познанства не треба да напредува, но кога изборите се врзуваат со одредени имиња и презимиња, довербата кај граѓаните дополнително опаѓа“, рече таа.
Јошевска Анастасовска додаде дека не гледа ништо спорно во изборот на сопругата на претседателот на Уставниот суд, Дарко Костадиновски. „Нејзиниот придонес е значаен – автор е на коментар на Законот за семејство кој е основна литература во судските канцеларии. Во овој конкретен случај, нема простор за сомнеж во влијание или злоупотреба“, истакна таа.
Заклучи дека системот мора да се фокусира на заслуги и транспарентност, ако сакаме судството да ја врати довербата што ја губи со секој контроверзен избор.
