Пратеникот и координатор на пратеничката група на коалицијата ВЛЕН, Беким Ќоку, изјави дека расизмот кон Албанците е длабоко вкоренет во македонското национално чувство и претставува начин на размислување што, според него, не може да се промени за кратко време.
Во интервју за косовската телевизија KTV, Ќоку посочи дека Албанците, според перцепцијата на мнозинството Македонци, се доживуваат како „непријател број два“, веднаш по Бугарите.
„Тоа е култура, тоа е менталитет, а менталитетот не се менува за една година. Потребно е време за да се обликува и созрее свеста. За жал, беа оставени сами на себе, со целосна слобода да ги изразуваат тие чувства кон Албанците“, изјави Ќоку.
Тој нагласи дека истражувањата на јавното мислење, според него, постојано покажуваат негативна перцепција за Албанците во македонското општество.
Во контекст на оваа изјава, пратеникот го повика македонскиот претседател Гордана Силјановска-Давкова, како и другите релевантни институции, јавно да се произнесат и да преземат одговорност.
Изјавата на Ќоку доаѓа по серијата националистички скандирања и инциденти за време на ракометниот натпревар меѓу Македонија и Романија што се одигра во саботата во Куманово, кога дел од публиката упати навреди со етничка содржина.
Настанот предизвика остри реакции во јавноста и ја актуелизираше темата за меѓуетничките односи во земјава.
