Скопје се наоѓа во сериозна институционална и еколошка криза, предупредува Теута Рамадани Џафери, членка на Управниот одбор на ЈП „Хигиена“ – Скопје. Таа остро ја критикува градоначалничката Данела Арсовска, обвинувајќи ја за „лажна правда“, политички реваншизам и колапс на основните јавни услуги.
Рамадани Џафери посочува дека состојбата е особено алармантна во општина Чаир, каде што, според неа, неправдата кон албанските граѓани е „длабока и постојана“.
„Градот никогаш не бил повалкан. Улиците кои некогаш се миеја двапати неделно, денес се оставени на немилост, додека граѓаните живеат во нечистотија и игнорирани проблеми,“ истакнува таа.
Теута потсетува дека токму албанските гласови ѝ овозможија на Арсовска да стане градоначалничка на Скопје, но денес, како што вели, тие се враќаат со потценување, хаос и административен распад.
Меѓу најсериозните обвинувања е и тврдењето дека директорот на ЈП „Хигиена“ извршил над 170 незаконски вработувања без одобрение од Министерството за финансии, во време кога претпријатието е заглавено со долг од 75 милиони денари.
„Ова не се празни зборови – зборувам врз основа на факти и документи,“ потенцира Рамадани Џафери.
Дополнително, според неа, платите на вработените доцнат со месеци, поради блокирани финансиски средства од страна на ЈП „Водовод и канализација“. Таа го оценува ова како „институционален притисок што директно го погодува обичниот работник и граѓанинот“.
„Дали ова е правдата за која зборува Данела Арсовска?“, прашува Рамадани Џафери, упатувајќи отворен повик до медиумите да ја посетат ЈП „Хигиена“ и лично да ја документираат, како што вели, вистинската слика на терен.
„Скопје заслужува чистота, достоинство и вистинска правда – а не политички пазарења и намерно лошо управување. Скопјани веќе не ги прифаќаат расипаните изговори“, заклучува Теута Рамадани Џафери.
