Инцидент со сомнителна супстанца во дистрибутивен центар на DHL во Германија предизвика вознемиреност и активација на итните служби. Најмалку 12 лица побараа медицинска помош откако беше пронајден бел прав на еден од пакетите во складиштето во Лангенцен, Бурграфенхоф.
Според полицијата, станува збор за инцидент поврзан со опасна супстанца. Повеќе вработени почувствувале иритации и здравствени симптоми по контакт со белиот прав кој се наоѓал на надворешноста на сомнителниот пакет. Седум лица се хоспитализирани, додека останатите беа згрижени на самото место.
На терен веднаш пристигнале над 100 припадници на итните служби, меѓу кои и единици за опасни материи, противпожарни тимови, деконтаминациска станица и спасувачки хеликоптер.
Во тек е истрага за потеклото на пратката, а властите се обидуваат да го идентификуваат испраќачот. Граѓаните се повикани да го избегнуваат регионот додека целосно не се отстрани ризикот.
