Првиот заменик-претседател на Владата и еден од лидерите на коалицијата ВЛЕН, Изет Меџити, упати жестока критика кон Демократската унија за интеграција (ДУИ) и нивниот потенцијален кандидат за општина Чаир, Бујар Османи, обвинувајќи го дека живее во бесправно изграден објект и дека нема морален кредибилитет да зборува за урбанизмот во оваа скопска општина.
„Кога станува збор за бесправната градба во Чаир, на сите веќе им е јасно зошто не зборуваат експонентите на ДУИ. И самиот нивен кандидат Бујар Османи живее во објект без дозвола, и затоа тој нема морален капацитет да зборува на оваа тема“, изјави Меџити во емисијата „Само Вести“ на Канал 5.
Според него, молкот на ДУИ по однос на сè погласните обвинувања за урбан хаос во Чаир е намерен и политички мотивиран.
„Целата структура на ДУИ се сокри зад Данела Арсовска и нејзината црна, раздорна и националистичка кампања против Чаир“, додаде Меџити.
Овие изјави доаѓаат во пресрет на претстојните локални избори, при што Чаир се очекува да биде едно од најжешките боишта помеѓу коалицијата ВЛЕН и ДУИ. Политичката атмосфера во општината се вжештува, а реториката помеѓу конкурентите станува сè поостра.
