Поранешниот министер за здравство, Арбен Таравари, преку објава на Фејсбук вечерва изнесе сериозни критики кон актуелниот министер Азир Алиу, обвинувајќи го за негрижа и блокирање на процесот на вработување на медицински кадар во тетовската клиничка болница.
Таравари објави документ доставен до Министерството за здравство на 15 јули 2025 година, кој, според него, содржи негативно мислење од Министерството за финансии за вработување на 155 лица на неопределено време. Како што вели, барањето било пратено уште на 2 јули – во време кога Алиу веќе ја извршувал функцијата министер.
„Зошто не влијаевте за да добиете позитивен одговор? Ви оставив подготвени сите вработувања, вклучувајќи ги и двете групи од по 300 специјализанти. Првата група речиси ја завршив. Каде сте со втората?“, праша Таравари.
Во објавата тој посочува дека секое барање од здравствените установи што пристигнало во Министерството за време на неговиот мандат било процесуирано навремено, со рок од неколку дена.
Освен за вработувањата, Таравари постави и низа прашања поврзани со другите здравствени проекти кои, според него, стагнираат:
- Каде се вработените што требаше да бидат сместени во ТЦ Лимак од 1 јули?
- До каде е реализацијата на бесплатните здравствени прегледи за лица над 40 години?
- Зошто е повлечена иницијативата за продолжување на надлежноста на Град Скопје за паркингот кај Клинички?
- Како ќе функционира новиот „Мој термин“ без склучен договор за одржување?
- Зошто не е започната изградбата на заштитниот ѕид кај Детската клиника, иако има обезбеден буџет и владина одлука?
Со ваквите прашања и обвинувања, Таравари наговестува дека постои сериозен застој во клучни здравствени процеси и реформи, и дека новото раководство на Министерството за здравство не ги продолжило активностите што тој ги започнал. Од министерот Алиу засега нема официјален одговор на обвинувањата.
