Пратеникот од редовите на ВМРО-ДПМНЕ, Бојан Стојаноски, во гостување на телевизија зборуваше за актуелната состојба со пожарите ширум земјата и изрази сомнеж дека најголемиот дел од нив се подметнати.
„Точно е тоа што го кажува директорот на Дирекцијата за заштита и спасување, бидејќи тие располагаат со информации од терен. Премногу е случајности за да се каже дека овие пожари се случуваат самостојно. Факт е дека има подметнување на теренот низ цела Република Македонија“, изјави Стојаноски.
Тој нагласи дека веќе имало лица фатени на самото место на подметнување:
„Имаше неколку лица кои беа уапсени. Се обиделе со различни материјали да предизвикаат пожар, но не успеале, и тие материјали биле пронајдени на терен.“
Според него, опозициската партија СДС се обидува да го искористи проблемот со пожарите за политички поени, дури и со дезинформации.
„На Фејсбук страната на СДС може да се види дека користат фотографии од пожари во Шпанија, обидувајќи се да прикажат дека тоа се случува и кај нас. Тоа е обид да се создаде немир и хистерија кај граѓаните и политички да се профитира“, рече Стојаноски.
Тој оцени дека целта на СДС е двојна, да релативизираат својата неспособност додека биле на власт, и да прикажат дека државата сега е нефункционална.
„Нивната девиза секогаш била, колку полошо за државата, толку подобро за нив“, додаде пратеникот.
Стојаноски истакна дека надлежните институции се ангажирани и преземаат мерки, но посочи дека е потребна и јавна осуда и правна одговорност за сите што намерно предизвикуваат пожари.
