Претседателот на Стоматолошката комора, Маријан Денковски, на денешната прес-конференција изјави дека Министерството за здравство нема основа за одземање на јавните овластувања на комората. Оваа изјава доаѓа по најавата на министерот за здравство, Азир Алиу, дека министерството привремено ќе ги преземе надлежностите за лиценцирање.
Денковски нагласи дека во комората биле спроведени неколку контроли од различни институции, меѓу кои и Министерството за здравство, Државниот санитарен и здравствен инспекторат и Управата за јавни приходи, и дека не биле констатирани никакви неправилности.
„Нема утврдено неправилности во кој било сегмент од работењето на Комората, па ниту во делот на јавните овластувања“, истакна Денковски.
Замагленo образложение од министерот
Претседателот на комората изрази збунетост од образложението на министерот, велејќи дека не знае „зошто и во кој обем“ е одземено овластувањето. Тој го цитираше министерот, кој рекол дека мерката е воведена „до стишување на работите во Комората“.
Денковски потврди дека минатата недела имале интензивна комуникација со министерот Алиу и дека им било ветено дека „доколку има неправилности, Комората секако ќе ги вложи сите напори да ги исправи“. Тој ги демантираше наводите дека на комората ѝ биле дадени конкретни насоки од министерството, а таа не постапила по нив.
