Американскиот претседател Доналд Трамп изјави дека распоредува 800 припадници на Националната гарда во Вашингтон и дека ја става локалната полиција под федерална контрола. На прес-конференција, тој ја образложи одлуката со потребата за борба против, како што го нарече, „бранот на беззаконие“.
„Ја распоредувам Националната гарда за да помогне во повторно воспоставување на законот, редот и јавната безбедност во Вашингтон. Нашиот главен град е преземен од насилни банди, крволочни криминалци и бездомници и нема да дозволиме да продолжи тоа. Ќе си го вратиме главниот град“, рече Трамп.
Различни податоци за криминалот
Градоначалничката на Вашингтон, демократката Муриел Баузер, ги отфрли тврдењата на Трамп, изјавувајќи дека градот не доживува пораст на криминалот. Таа посочи дека насилниот криминал минатата година бил на најниско ниво во повеќе од три децении.
Според податоците на градската полиција, насилниот криминал се намалил за 26% во првите седум месеци од 2025 година, откако во 2024 година паднал за 35%. Вкупниот криминал се намалил за 7%.
Тактика што се користела и во минатото
Ова не е првпат Трамп да ја користи Националната гарда. За време на својот прв мандат, тој ги испрати во 2020 година за да помогнат во задушувањето на демонстрациите против полициската бруталност по убиството на Џорџ Флојд. Во јуни, тој испрати 5.000 војници во Лос Анџелес како одговор на протестите против неговата имиграциска политика.
Трамп ги отфрли критиките дека создава криза со цел да ги прошири претседателските овластувања.
