Македонската тенисерка Лина Ѓорческа оствари значајна победа во првото коло на W75 турнирот во Куршумлијска Бања, Србија, совладувајќи ја четвртата носителка, Деспина Папамихаил од Грција, со 2-1 во сетови (3:6, 6:1, 6:2). Натпреварот траеше 1 час и 50 минути.
Иако Папамихаил го освои првиот сет со 6:3, Ѓорческа успеа да направи целосен пресврт во натпреварот. Во вториот сет, по резултат 1:1, македонската тенисерка одигра серија од пет гема и го доби сетот со 6:1.
Во решавачкиот трет сет, Ѓорческа ја продолжи доминацијата, поведувајќи со 2:0. И покрај тоа што противничката изедначи на 2:2, Ѓорческа со нова серија од четири гема го доби сетот со 6:2 и ја запечати победата.
Во второто коло, Ѓорческа ќе се соочи со Дарја Астахова, тенисерка која ја совлада пред само една недела.
