Протестите продолжија во неколку градови во Србија вечерва, како реакција на вчерашните напади од поддржувачите на Српската напредна партија (СНС) врз демонстрантите во Врбас и Бачка Паланка. Собирите беа организирани од групата „Студенти во блокада“ пред канцелариите на СНС и полициските станици.
Најголемите протести се одржуваат во Белград, Нови Сад, Ниш, Крагуевац, Суботица, Шабац и други градови. Ситуацијата ескалираше во Нови Сад, каде што пиротехнички средства беа фрлени кон демонстрантите од просториите на СНС. Демонстрантите одговорија со кршење на прозорците на партиските простории, по што полицијата формираше кордон за да ги раздели.
Вчера, во Врбас и Бачка Паланка, поддржувачите на СНС ги нападнаа демонстрантите со пиротехника, камења и шишиња, при што беа повредени неколку лица, вклучувајќи и асистент-снимател на N1.
Директорот на српската полиција, Драган Васиљевиќ, изјави дека полицијата спречила големи конфликти и дека не штителе ниту една група, туку се фокусирале на одржување на јавниот ред и мир. Сепак, сведоштвата од терен сугерираат дека полицијата била пасивна за време на нападите.
