Средбата помеѓу американскиот и рускиот претседател, Доналд Трамп и Владимир Путин, привлече големо внимание, особено поради неколку необични моменти забележани од новинарите. Наместо да даде изјава, Путин со гестикулации ги одбегна прашањата, а потоа следеа и други симболични чинови што ги подгреаја шпекулациите.
Пред да влезат на средбата, собраните новинари се обидоа да добијат изјави од двајцата лидери. На прашањата упатени кон рускиот претседател, како: „Дали ќе престанете да убивате цивили?“ и „Дали ќе се согласите на прекин на огнот?“, Владимир Путин не одговори со зборови. Наместо тоа, тој само покажа со прст на увото, гестикулирајќи дека не слуша, а потоа ги крена рамената.
Откако ги одмина новинарите, Путин му се придружи на Трамп во неговата претседателска лимузина. Овој чин е ретка привилегија за странски државници, кои вообичаено се возат во свои автомобили. Дел од руските медиуми го протолкуваа овој гест како знак на пријателство и ран почеток на разговорите.
Внимание привлече и сцената со ракоплескањето на Трамп. Откако Путин излезе од рускиот владин авион и му се приближи на американскиот претседател, Трамп беше забележан како му ракоплеска.
