На прес-конференцијата, портпаролката на СДСМ, Богданка Кузеска, остро ги критикуваше изјавите на премиерот Христијан Мицкоски дека платите растат за „11, 12, 13 проценти на месечно ниво“. Според СДСМ, ваквите изјави се навреда за граѓаните, бидејќи реалноста е сосема спротивна – трошоците за живот растат, а платите стагнираат.
Кузеска истакна дека официјалните податоци ја демантираат власта. Вредноста на синдикалната потрошувачка кошничка пораснала за 3.473 денари за само четири месеци, додека просечната плата во истиот период се зголемила за само 1.033 денари. Ова значи дека за покривање на месечните трошоци на едно семејство потребни се речиси 2,7 минимални плати.
СДСМ посочува дека минималната плата во земјата е на дното во Европа и на Балканот, додека во соседните земји како БиХ, Србија и Црна Гора таа е многу повисока. И покрај ова, владата на ВМРО-ДПМНЕ, според нив, одбива да ја зголеми минималната плата на 500 евра.
Портпаролката обвини дека додека граѓаните едвај врзуваат крај со крај, функционерите на ВМРО-ДПМНЕ трошат на луксузни возила, приватни авиони и егзотична храна. Таа додаде дека БДП по глава на жител е далеку под европскиот просек, што е доказ за лошата економска состојба.
„Додека Мицкоски зборува за ‘четврта економија во Европа’ и ‘шеста економија во свет по инвестиции’, реалноста е сосема спротивна. Македонија е четврта во Европа, но одзади, на листата на најсиромашни земји“, изјави Кузеска.
На крајот, од СДСМ побараа владата веднаш да ги покачи платите и да ги прифати нивните предлози за зголемување на минималната плата на 500 евра и на платите во сите сектори.
