Кандидатот за градоначалник на Општина Чаир од редовите на ДУИ, Бујар Османи, најави дека негова главна цел е општината да стане целосно транспарентна. Тој претстави иновативен сет на мерки наречен „Граѓанско око“, кој вклучува употреба на вештачка интелигенција за откривање на сомнежи за корупција.
Османи нагласи дека Општина Чаир е една од најнетранспарентните во земјава, каде што „корупцијата и непотизмот го задушуваат развојот“. Тој вети дека со промената на власта на 19 октомври, Чаир ќе влезе меѓу првите пет општини по транспарентност.
„Наместо да им служат на граѓаните, тие работат за свои интереси“, изјави Османи, нагласувајќи дека неговите ветувања ќе се докажат со дела, а не само со зборови.
Програмата „Граѓанско око“ се состои од четири нови решенија кои Османи планира да ги воведе:
- Јавно отворање на тендерите: Секое отворање на понуди за јавни набавки ќе се пренесува во живо и ќе биде достапно онлајн, што е дозволено со закон.
- Независен мониторинг: Големите тендери ќе бидат следени од независни НВО и антикорупциски експерти, со цел да се обезбеди фер и законска постапка.
- „Јавна каса“: Граѓаните ќе имаат можност онлајн да ги следат приходите и расходите на општината преку едноставна алатка.
- „АИ контрола“: Постепено ќе се воведуваат алатки за вештачка интелигенција кои автоматски ќе ги проверуваат постапките, ќе ја елиминираат човечката пристрасност и ќе алармираат доколку има сомнежи за незаконско работење.
Османи порача дека овие механизми ќе обезбедат вистинска транспарентност и ќе ја заштитат општината од корупција.
