Италијанската јавност е шокирана по откривањето на групата „Моја жена“ (Mia Moglie) на Фејсбук, која имаше околу 32.000 членови и во која се споделувале интимни фотографии од жени, честопати снимени без нивно знаење.
Групата е отстранета од „Мета“, матичната компанија на Фејсбук, поради кршење на нивните политики за сексуална експлоатација.
„Виртуелно силување“ и културно насилство
Италијански медиуми и јавни личности ја осудија појавата на ваква група. Илјадници граѓани веќе ја пријавиле групата за кибер-криминал, а италијанската писателка Каролина Каприа изјави дека е згрозена од она што го видела.
„Ова поврзување на насилство со сексуалноста е толку вкоренето во нашата култура, мажите не ги кријат своите имиња и лица и пишуваат во јавна група“, истакна Каприа.
Пратеничката на Европските зелени, Фиорела Забата, ја нарече групата „виртуелно силување“ и повика на заедничка борба против ваквите платформи, вклучувајќи ги и граѓанското општество и политиката.
Во Италија, од 2019 година, споделувањето на сексуално експлицитни содржини без согласност е законски забрането.
