Стадионот „Петар Милошевски“ во Битола доби официјална потврда од УЕФА и ќе биде домаќин на квалификацискиот натпревар за Европското првенство помеѓу македонската репрезентација до 21 година и Италија. Натпреварот ќе се одигра на 9 септември.
Фудбалската федерација на Македонија (ФФМ), во соработка со Општина Битола, инвестираше околу 150.000 евра во период од 40 дена за да го модернизира стадионот и да го доведе до европските стандарди.
Детали за извршените подобрувања:
- Нови столчиња на јужната трибина.
- Целосно обновена тартан патека.
- Комплетно опремени службени простории и медија дел.
- Набавени нови клупи за резервни фудбалери.
- Уреден ВИП простор и инсталиран нов ЛЕД семафор, донација од ФФМ.
- Теренот е обновен со механизација и лица ангажирани од ФФМ.
Претседателот на ФФМ, Масар Омерагиќ, изјави дека овој успех е пример за сите и потврда дека со заедничка работа се постигнуваат резултати. Тој најави дека следната фаза е поддршка на реконструкцијата на градскиот стадион во Тетово, како дел од стратегијата за модернизација на фудбалската инфраструктура низ државата.
