Сите членки на Советот за безбедност на Обединетите нации, освен САД, одржаа заедничка прес-конференција на која повикаа на итно прекинување на огнот во Газа. Тие изразија длабока загриженост поради „намерно предизвиканиот“ глад во палестинската енклава.
Заменик-постојаниот претставник на Гвајана во ОН, Тришал Персо, истакна дека гладот во Газа е прв официјално потврден во регионот на Блискиот Исток и дека секојдневно луѓе, особено деца, умираат од неухранетост.
„Ова е криза предизвикана од човекот, иако употребата на глад како оружје во војната е строго забранета со меѓународното хуманитарно право“, рече Персо.
Претставниците на Словенија, Алжир, Кина, Данска, Франција, Грција, Пакистан, Панама, Јужна Кореја, Русија, Сиера Леоне, Сомалија и Велика Британија се приклучија на овој повик. Ондина Дробиќ, заменик-постојан претставник од Словенија, додаде дека покрај прекинот на огнот, се бара и ослободување на сите заложници, Израел да ја отвори Газа за хуманитарна помош и да се откаже од плановите за инвазија на градот Газа.
„Хуманитарната криза мора да се реши без одлагање и Израел мора да го промени курсот“, заклучи Дробиќ.
