Младите социјалдемократи од Струмица отворија Младински клуб на Леблебеџиската улица. Идејата е младите да имаат сопствен простор за дружење, активизам и развивање на идеи за подобрување на животот во нивната заедница, во пресрет на локалните избори.
Христијан Ефтимов, претседател на СДММ од Струмица, истакна дека клубот ќе биде место за развој на нови приказни и дружби, со цел да се создаде „победничка Струмица кадешто сите млади ќе имаат можност за развој и напредок“.
На отворањето присуствуваа општинското раководство на СДСМ Струмица предводено од претседателот и кандидат за градоначалник, Марјан Даскаловски, претседателот на СДММ, Трајче Стојчевски, и лидерот на СДСМ, Венко Филипче.
Филипче им порача на младите да бидат отворени, да комуницираат и да се поврзуваат со луѓето.
„Ние сме тука да им помагаме на луѓето, им помагавме и кога бевме на власт, сега сме тука и локална власт, се бориме да ја освоиме повторно власта за да практикуваме и носиме добри политики за сите граѓани и за државата“, изјави Филипче, ветувајќи им помош и поддршка.
