Командантот на руската армија, генерал-полковник Валериј Герасимов, објави дека Русија ќе продолжи со инвазијата во Украина со нови цели за есенската офанзива, и покрај повиците од Западот за преговори. Оваа изјава доаѓа во момент кога конфликтот е во критична фаза, а двете страни тврдат дека контролираат значителни територии.
„Во моментов, нападите се во тек на целата линија на фронтот. Денеска ги дефинираме задачите на поединечните групи на вооружените сили за есенскиот период“, рече Герасимов.
Москва бара целосно повлекување од Доњецк
Според Герасимов, руската армија контролира голем дел од украинските региони: 99,7% од Луганск, 79% од Доњецк, 76% од Херсон и 74% од Запорожје. Како предуслов за прекин на огнот, Москва бара украинската армија целосно да се повлече од регионот Доњецк. Украинскиот претседател Володимир Зеленски категорично ги отфрла овие барања, а Украина сè уште ги држи градовите Славјанск и Краматорск, кои се сметаат за клучни одбранбени упоришта.
Обвинувања меѓу Москва и Западот
Рускиот преговарач Кирил Дмитриев ги обвини западните сојузници на Киев дека го продолжуваат конфликтот со поставување на „нереални барања“, а истовремено ја повика Европската унија да престане да го „саботира мировниот процес“. Москва постојано ја отфрла можноста европските земји да испратат свои сили во Украина за да обезбедат мир.
Од друга страна, европските земји ја обвинуваат Русија дека ги користи мировните преговори како тактика за да добие време и да изврши нови напади, со што дополнително се влошува хуманитарната ситуација.
