Демократската унија за интеграција (ДУИ) остро ја критикуваше Владата, обвинувајќи ја за недостаток на политичка волја и за неуспех да ја води државата кон европската интеграција. Партијата смета дека изјавите на владините претставници дека „една година не е доволна за уставните измени“ се директен доказ за ова.
Во партиското соопштение, ДУИ истакнува дека Владата, покрај блокирањето на европскиот пат, ги напаѓа и основите на Охридскиот мировен договор и меѓуетничката еднаквост. Како аргументи, ги наведува следните точки:
Укинување на балансерот, што го нарушува правичното застапување на Албанците и другите заедници.
Девалвација на Охридскиот договор, преку назначување на лица со „антиалбански и антиевропски ставови“ за негова имплементација, како што е Иван Стоилковиќ.
Бришење на дијаспората од политичкото претставување и намалување на бројот на Албанците во официјалните статистики.
Непочитување на Законот за употреба на јазиците, со девалвирање на Инспекторатот и Агенцијата за примена на јазиците.
ДУИ предупредува дека Владата отвора нови фронтови и против Бадентеровото мнозинство, кое го нарекува еден од најсилните уставни столбови што гарантира меѓуетничка стабилност и заштита од мајоризација.
„Секој обид за релативизирање или преиспитување на Бадентер претставува обид за враќање на државата назад во исклучување и дискриминација“, се вели во соопштението.
Партијата смета дека зад овие потези стојат опасни идеи кои имаат за цел да изградат етнички држави, што се манифестира преку удари врз Охридскиот договор и блокирање на европскиот пат на земјата.
На крајот, ДУИ порача дека ќе го брани Охридскиот мировен договор и евроатлантскиот курс, додавајќи дека Албанците нема да дозволат враќање на државата во „неправда и исклучување“.
