Првиот вицепремиер и министер за животна средина, Изет Меџити, најави дека државата ќе субвенционира купување на 200 електрични такси-возила како дел од напорите за намалување на загадувањето.
На работна средба со Унијата на здруженија на таксисти, Меџити истакна дека новите електрични возила се со високи еколошки стандарди, без штетни емисии и бучава. Целта е тие постепено да ги заменат постоечките такси-автомобили на дизел, бензин и гас.
Вкупната инвестиција е проценета на 5,6 милиони евра, со просечна цена од 28.000 евра по возило. Министерството ќе субвенционира 15% од сумата, односно околу 840.000 евра.
Според експертите, оваа иницијатива ќе го намали загадувањето со јаглерод диоксид за над 2.700 тони годишно, што е еквивалентно на садење над 120.000 садници.
Меџити потсети и на други еколошки иницијативи, како што се воведувањето на систем за споделување возила со 100 електрични автомобили, електрични тротинети и велосипеди, донацијата на 6 електрични автобуси за Град Скопје, како и засадувањето на десетици илјади садници.
