Националната алијанса за интеграција (НАИ) денеска одржа прес-конференција на која го повика Изет Меџити, актуелен заменик-претседател на Владата и министер за екологија, итно да поднесе оставка од своите функции, бидејќи е истовремено и кандидат за градоначалник на Општина Чаир.
Од НАИ сметаат дека овој случај ги загрозува стандардите на демократијата и еднаквоста во политичката трка. Тие потенцираат дека Меџити, иако ја објавил својата кандидатура, не се повлекол од високите државни функции.
НАИ поставува неколку прашања до Меџити, алудирајќи на неговата позиција:
- Зошто не поднесува оставка?
- Дали се плаши од пораз на изборите на 19 октомври?
- Дали си остава „план Б“ за да ја задржи министерската фотелја доколку изгуби?
Според НАИ, ова е навредливо за граѓаните и институциите и претставува повреда на принципите на политичка еднаквост. Тие тврдат дека на Чаир му е потребна чесна и транспарентна изборна трка, а не кандидат што се натпреварува со привилегии од власта.
„Ако навистина сака да му служи на Чаир, нека излезе пред граѓаните само како кандидат, без власта во џеб и без државни ресурси ставени во служба на неговата кампања“, велат од НАИ.
Со јасна порака, тие му порачуваат на Меџити: „Избери: министер или кандидат. Двете не одат заедно!“. Секое одложување, според нив, е доказ за страв од изборната пресуда.
