Францускиот амбасадор во Израел, Фредерик Журн, изјави дека кампањата на Франција за признавање на палестинска држава е од суштинско значење за да се добие поддршката од арапските земји за разоружување на Хамас.
Како што пренесе „Тајмс оф Израел“, Журн објасни дека признавањето на Палестина е клучен лост за ангажирање на муслиманските и арапските држави да прифатат идна нормализација на односите со Израел.
„Ова ги наведе земјите како Катар да кажат дека иднината на Газа мора да биде без Хамас“, изјави Журн.
Амбасадорот потенцираше дека одлуката на Франција често се прикажува како „награда за терор“, но дека тоа не е точно. Според него, процесот поддржан од Франција содржи предлог, потпишан од Арапската лига, за нормализација на односите со Израел заедно со палестинска држава.
Журн се осврна на декларацијата од конференцијата на Обединетите нации во јули, каде што арапските и муслиманските земји, вклучувајќи ги Саудиска Арабија, Катар, Египет, Јордан и Турција, за првпат го осудија нападот на Хамас од 7 октомври 2023 година. Во истата декларација се бара ослободување на сите заложници и разоружување на Хамас.
Амбасадорот заклучи дека безбедноста на Израел е исклучително важна за Франција и дека „мирот е тежок, а единственото нешто што е потешко е војната“.
