Јавниот увид во Избирачкиот список за Локалните избори 2025 година завршува на полноќ. Граѓаните имаат уште неколку часа да ги проверат своите податоци во подрачните единици и канцеларии на ДИК или електронски, преку официјалната веб-страница на Државната изборна комисија (ДИК).
Дополнително, на полноќ на 13 септември, истекува и крајниот рок за поднесување на листите со кандидати за градоначалници и советници до општинските изборни комисии (ОИК).
Според информациите од ДИК, заклучно со 9 септември, вкупно 5.729 граѓани извршиле проверка на своите податоци. Од нив, 3.397 се мажи и 2.332 се жени.
ДИК информира дека:
- Осум лица побарале запишување во Избирачкиот список.
- 136 лица побарале бришење, од кои 134 поради смрт и две поради отпуст од државјанство.
- 59 лица побарале промена на податоците, најчесто поради промена на презиме или адреса.
Барањата за промена на податоците во Избирачкиот список може да се достават до ДИК преку електронската адреса upisis@sec.mk, со приложување на потребните докази. ДИК е обврзана да одлучи по барањата во рок од 24 часа. Доколку барањето биде одбиено, граѓанинот има право да поднесе жалба до Управниот суд во рок од 24 часа.
До 11 септември: Политичките партии ги доставуваат барањата за Избирачкиот список до ДИК.
- До 26 септември: ДИК го заклучува Избирачкиот список.
- До 3 октомври: ДИК го потпишува финализираниот Избирачки список, односно изводите за гласање.
- 19 октомври: Локални избори во 80 општини и Град Скопје, на вкупно 3.480 избирачки места.
- 29 септември: Започнува изборната кампања.
