Претседателот на Демократските сили на Ромите (ДСР), Шабан Салиу, синоќа ја промовираше својата кандидатура за градоначалник на општина Шуто Оризари.
Во својот говор пред жителите, Салиу изрази гордост што Шуто Оризари е единствената општина во светот водена од ромската заедница. „Денес заеднички носиме одлука за нашата иднина, за чесно и одговорно управување со нашата општина“, порача тој.
Салиу најави дека негов главен приоритет ќе биде подобрување на инфраструктурата. Во својата програма, тој вети асфалтирани улици, проширување на водоводната и канализациската мрежа, поставување ЛЕД осветлување и изградба на безбедни пешачки патеки. Покрај ова, најави и изградба на нови социјални станови за семејствата на кои им е потребен дом.
Посебен акцент стави на образованието и културата, најавувајќи изградба на модерно основно училиште, поддршка на културните институции и создавање услови за младите да ја негуваат ромската традиција, а да стекнуваат современи знаења.
Салиу исто така најави и формирање на мобилен здравствен тим, целосна обнова на амбулантата, изградба на дом за постари лица и формирање на Фонд за поддршка на ранливите семејства.
