Македонскиот народен театар (МНТ) денеска, на 11 септември, ќе гостува на 13. Театарски фестивал за деца „Малиот принц“ во Штип со претставата „Жива досада“. Гостувањето е во организација на НУЦК „Ацо Шопов“ – Штип, кој традиционално ги обединува најзначајните детски театарски продукции од регионот.
Претставата е наменета за деца над пет години и на иновативен начин ја обработува темата на досадата, која често се игнорира. „Жива досада“ е авторски проект на актерките Билјана Јовановска, Изабела Јакимова и Нина Деан, а во режија на Јовановска.
Преку духовита и интерактивна форма, претставата ги охрабрува децата да ја искористат досадата како можност за креативност, игра и самоистражување. Актерката и авторка Изабела Јакимова истакнува дека досадата не е непријател, туку „креативен простор“ кој им овозможува на децата да се поврзат со себеси и со светот околу нив.
Со оваа претстава, МНТ испраќа важна порака и до родителите – да не го преоптоваруваат секој момент од животот на детето со активности, туку да им остават простор за самостоен развој. Во претставата настапуваат Гоце Андонов, Нина Деан, Изабела Јакимова, Јана Вељановска и Билјана Јовановска.
