Од 13 до 28 септември, на тениското игралиште во Маврови Анови ќе се одржи „Mavrovo Open 2025“, првиот аматерски и хуманитарен тениски турнир во регионот. На турнирот ќе учествуваат 32 аматери и 8 полупрофесионални играчи.
Турнирот е волонтерска иницијатива на група пријатели од Маврово, чија цел е да го обноват запуштениот тениски терен, да создадат спортски настан за заедницата и да помогнат во хуманитарна кауза.
Сите средства собрани од котизациите ќе бидат наменети за обнова на основното училиште во село Маврово, во кое оваа година се запиша само еден прваче. Училиштето има само четири ученици, што ја покажува борбата на малите средини за опстанок.
Организаторите велат дека со ова сакаат да го спасат училиштето од затворање и да дадат мотив на младите луѓе да останат или да се вратат во Маврово. Според Милан Павловски, еден од организаторите, Маврово има потенцијал да стане спортски и туристички центар, а ваквите иницијативи ќе помогнат во развојот на заедницата.
Покрај натпреварите, настанот ќе понуди и програма за сите посетители, вклучувајќи дегустација на локални производи, детска зона, тениски игри, музика и рекреативни активности.
Наградите за победниците се поврзани со локалната туристичка понуда, како што се сезонска ски-карта, викенд во хотел, ATV тура и јавање коњи.
Организацијата на турнирот е поддржана од Општина Маврово и Ростуше, Национален парк Маврово и ЈПКД Маврово, како и од локалната бизнис заедница.
