Директорот на Дирекцијата за заштита и спасување, Стојанче Ангелов, изјави дека утрово продолжило засиленото затрупување на делот од депонијата „Дрисла“ од кој се појави чадот. Тој посочи дека критичната површина е со големина на фудбалско игралиште, а „отворен оган не може да се забележи, чадењето е делумно намалено, но сè уште присутно“.
Според Ангелов, двата новоизградени земјени патишта низ заезерената површина од отпадни води, длабока околу 1,5 метри, значително го олеснуваат пристапот до местото.
„Во овој момент работат оптимален број на камиони, багери и булдожери, а како што ќе се создаваат услови нивниот број ќе се зголемува“, рече Ангелов.
Тој додаде дека на дивата депонија „Вардариште“ нема горење ниту чадење, но затрупувањето на критичниот канал каде што се одвиваше пожарот продолжува и денеска.
