Научници од лабораторијата АМБИКОН при Универзитетот „Гоце Делчев“ – Штип започнаа со 24-часовен мониторинг на квалитетот на воздухот во Трубарево, каде неодамна се случи пожар во депонија за електронски отпад. Ректорот на УГД, Дејан Мираковски, најави дека првичните резултати од анализата се очекуваат за седум дена.
Поставени се два мерни уреди на 50 и 100 метри од складиштето на компанијата „Ф-Групација“. Ќе се анализираат:
- 32 елементи, вклучувајќи никел, кадмиум, арсен, олово и жива.
- Целосен хемиски состав на честичките.
- Водорастворливи јони, како нитрати, сулфати, амониум, хлор и калиум.
- Елементарен јаглерод.
Мираковски потенцира дека со согорувањето на литиумските батерии и пластика се формираат гасови и честички, од кои дел се трајни органски загадувачи.
Во моментов не може да се определи точната зона на ширење на загадувањето, бидејќи тоа зависи од количината и видот на изгорениот материјал, како и од атмосферските услови. Првична проценка е тешко да се направи поради недостаток на точни информации за содржината на складот.
По добивањето на резултатите од анализите на воздухот, а исто така и на водата и почвата, ќе се утврди дали е потребна санација на евентуално контаминираната зона.
