По 25 години, Жозе Мурињо се враќа на тренерската клупа на Бенфика, клубот каде што ја започна својата кариера како главен тренер. Според „Си-Ен-Ен Португалија“, остануваат само мали формалности до официјалното назначување на „Специјалниот“.
Мурињо доаѓа како замена за Бруно Лаж, кој беше отпуштен по шокантниот пораз од Карабаг во Лигата на шампионите. Иронично, и самиот Мурињо беше неодамна отпуштен од Фенербахче токму поради елиминацијата во плеј-офот за Лигата на шампионите од страна на неговиот иден клуб – Бенфика.
Првиот ангажман на Мурињо во Бенфика траеше кратко, од 20 септември до 5 декември 2000 година, кога замина по само десет натпревари. И покрај тоа што имаше пет победи, вклучувајќи ја и онаа против градскиот ривал Спортинг, се повлече откако дозна дека новоизбраниот претседател има други планови.
Потоа, Мурињо ја изгради својата легендарна кариера со освојување на Лигата на шампионите со Порто, а потоа водеше тимови како Челзи, Интер, Реал Мадрид, Манчестер јунајтед, Тотенхем, Рома и Фенербахче.
За претседателот на Бенфика, Руи Коста, Мурињо е повеќе од обичен тренер. Тој го гледа како долгорочен партнер кој ќе помогне во создавање на позитивна атмосфера и трансфер стратегија. Ангажманот на Мурињо се очекува да ја врати довербата на навивачите и да го подигне авторитетот на клубот во Европа.
